Peter Kunze vertellt

Isenbahner- un anner Geschichten ut oll un niege Tieden

Een urigen Sweriner as Peter Kunze een is hett ’n Bauk up Platt ruterbröcht: „Smustergrieniges ut Soebensee un anner Vertellers”. Wo disse Urt woll liggen deit? Soeben Seen un ’n Hümpel Hüser twüschen mang – süh, dat künn doch woll blots uns‘ Lanneshauptdörp sien.

Peter Kunze is Johrenden Isenbahner west un ut disse Tied, as he mit sien Lok dwars dörch uns‘ Land fohrte, vertellt he ’n Dutzend eegen Biläwnisse – deepsinnig un – na äben – smustergrienig.

Denn geiht he tau de Kemedispälers un böhrt Korl (Charly) Wilcke von de Fritz-Reuter-Bühn ut de Mustkist tauhöcht – bet hüt is de Schauspäler, de von 1948 bet 1975 tau de Späldäl hürte, unvergäten. Binah nägenunachentig Johr is he worden in sien Dodsjohr 1995.

Up’t Letzt gifft dat noch acht Vertellers von dit un dat ut dat olle un niege Swerin. Tau de Geschichten hett Uwe Gloede ut
Kirchdörp up Poel mennig Teiknungen taustüert. Väl von de Vertellers hett vör Johren de Tiedingsbilag „Norddütscher Lüchttorm”
afdruckt un so is dat klor west, dat de „Lüchttorm”-Redakteur Dieter W. Angrick een wat fründlich Nahbemerken tau de Utgaw schräben hett.

Peter Kunze sien Vertellers sünd ruterkamen as „MV-Taschenbuch” in’n BS-Verlag Rostock. ISBN 978-3-86785-037-7.

Jöching
Wat heww ick miene Heimat leew – Von Berthold Brügge –
Wat heww ick miene Heimat leew, wenn wild de Stormwind bruust to Fröhjohrstied, wenn klor de Sicht up Land un See, wur is se denn so hoch un wiet. Wur süht mien Heimat leewlich ut, wenn ut de slanken Barkentelgens bräkt dat junge Grön un swartbunt Veeh up wiede, frische Wischen treckt.

Wat heww ick miene Heimat giern, wenn’t Sommerdag un blag de Häben lücht’t, wenn’t Kurn riept un de Bloomen bläuhn un vör mi up de Lewark stiggt. Wur is mien Heimat wunnerschön, wenn ehr de Sünn de letzten warmen Strahlen schickt, wenn Hoge Tied un Aust vörbie, de Wind dörch harwstlich Bläder strickt. Wat heww ick miene Heimat leew, wenn Riep un Snei liggt oewer Feld un Boom, wenn all dat Läben üm mi rüm dröömt sienen Fröhjohrsdroom.

Zuletzt aktualisiert am 20. November 2022 um 23:51 . Wir weisen darauf hin, dass sich hier angezeigte Preise inzwischen geändert haben können. Alle Angaben ohne Gewähr.

Scroll to Top